Evrópumálin munu koma Samfylkingunni til góða

Umræðan á næstu mánuðum innan Samfylkingarinnar og Vinstri Grænna mun að mestu leyti snúast um að sýna fram á ágæti ríkisstjórnarsamstarfsins og hve mikill árangur hefur náðst. Þetta segir Stefanía Óskarsdóttir, stjórnmálafræðingur, sem er gestur Sigurjóns M. Egilssonar í útvarpsþættinum Á Sprengisandi þennan morguninn.

Auk Stefaníu situr Guðmundur Hálfdanarson, sagnfræðingur, hjá Sigurjóni og saman ræða þau landslagið í stjórnmálum á landinu nú þegar styttist í alþingiskosningar. Guðmundur segir að Samfylkingin muni keyra á Evrópumálinu enda verði það eitt af stóru málunum í vetur. „Þeir eru eini stjórnmálaflokkurinn sem er opinn fyrir ESB. Það mun koma þeim til góða," segir Guðmundur þrátt fyrir að staðan í ESB eins og stendur sé ekki heillandi. Hann telur að víða sé fólk sem er jákvætt gagnvart Evrópusambandinu.

Þau telja allar líkur á því að ekki verði komnar skýrar línur í ESB málið fyrir næstu kosningar. „ESB hefur engan áhuga á að stækka í bili. Þar eru menn uppteknir af öðrum málum," segir Guðmundur og því muni málin ekki skýrast í bili. Bæði telja þau einhverjar líkur á því að aðildarviðræðum Íslands við Evrópusambandið verði hætt eftir næstu kosningar ef Samfylkingin hlýtur slæma kosningu.