Ekki ástæða til að banna einkarekstur í heilbrigðisþjónustu

Hugmyndir fyrrverandi heilbrigðisráðherra um að leggja fram frumvarp um að banna einkarekstur innan heilbirgðiskerfisins eru ótímabærar að mati formanns Læknafélags Íslands.

Álfheiður Ingadóttir þingmaður Vinstri hreyfingarinnar - græns framboðs vill að lagt verði fram frumvarp sem bannar velferðarþjónustu í gróðaskyni. Þetta kom fram í stjórnmálaumræðum á flokksráðsfundi sem lauk í gær en fréttavefurinn Smugan greinir frá málinu.

Þar segir að á fundinum sagði Álfheiður að í stað nýlenduherra væru komin fram risafyrirtæki sem geri út kerfið. Hún fagnaði því að vinstri flokkurinn í Svíþjóð hefði lagt fram slíkt frumvarp og vildi að vinstri græn fylgdu dæmi þeirra. Skoraði hún á þingflokkinn að vinna slíkt frumvarp og leggja fram.

Um 40 prósent af heilbrigðisþjónunni í landinu væri nú ekki á vegum hins opinbera. Að stórumhluta væru það mikilvægar sjálfseignarstofnanir sem ekki væru reknar í gróðaskyni. Hún væri hins vegar að ræða um heilbrigðisþjónustu sem rekin væri í ábataskyni og til að soga fé út úr þjónustinni, það væru til að mynda tannlænkningar og ýmsar sérgreinalækningar.

Fréttastofa hafði samband við Þorbjörn Jónsson, formann Læknafélags Íslands, vegna þessara hugmynda. Sagði hann að sér þættu þessar hugmyndir ótímabærar hér á landi.

„Ég held að það kerfi sem við höfum haft, sem er blanda af ríkisreknu og einkareknu heilbrigðiskerfi, hafi gefist Íslendingum ákaflega vel og það sé ekki mikil ástæða til að breyta því," segir hann.

Hann sagði að eflaust hefði þetta verið vandamál í sumum löndum en hann hafi ekki vitað til þess að það hafi verið vandamál hérlendis.

„Við erum ekki að tala um það hér á landi. Þetta eru þá hópar eða læknar sem hafa tekið sig saman og starfað saman. Þetta eru ekki stór fyrirtæki sem eru í eigu einhverra annarra en lækna," segir Þorbjörn Jónsson.