Pétur Blöndal uppgötvar afl Youtube

Pétur Blöndal þingmaður vinnur nú að því að koma tillögum sínum sem eiga að koma í veg fyrir peningahringekjur á myndabandasíðuna Youtube. Myndböndin verða á þremur tungumálum og eru Bandaríkjamenn þegar byrjaðir að vinna að þeim.

Myndböndin eru ný komin inn á vefinn en hafa nú þegar fengið talsvert áhorf. Með þeim er Pétur að fylgja eftir eftir tillögum sínum sem samþykktar voru í sumar á þingi Öryggis- og samvinnustofnunar Evrópu eða ÖSE. Tillögurnar miða að því að koma í veg fyrir hringferla peninga með raðeignarhaldi og innistæðulausa eignabólu fyrirtækja.

„Ég var að uppgötva það mikla afl sem er í Youtube. Ég sem sagt er þarna með smá fyrirlestur, örstuttan um hlutverk eiginfjár hjá hlutafélögum og svo að það sé villa í kerfinu sem gerir það að verkum að hægt er að búa til eigið fé með því að láta peningana fara í hring. Þetta er mjög alvarleg villa í hlutabréfaforminu sem er annars óskaplega sniðug uppfinning. Það þarf að laga hana en það þarf að laga hana alþjóðlega því hlutafélög eru öll orðin alþjóðleg meira og minna," segir Pétur.

Pétur segir markmið tillagnanna ekki ná fram að ganga nema þær séu samræmdar meðal allra land og því verði að koma þeim yfir á fleiri tungumál. En þýsku útgáfuna setti hann á vefinn í dag og von er á enski útskýringu innan tíðar.

Pétur segir Þjóðverja og Bandaríjkamenn þegar hafa sýnt málinu áhuga.

„Þetta er orðið verkefni hjá þeim, þeir eru svo skipulagðir og þetta er eitt af þeim verkefnum sem þeirra þing er að vinna í," segir Pétur.

Pétur telur að youtube geti verið aflmikið tæki til að laga þessa veilu.

"Ég er að vona það, því þetta er eitthvað sem við verðum að laga, ég held því fram að þetta sé ein af meginástæðunum fyrir hruninu á Íslandi," segir Pétur.

En voru Íslendingar öðrum fremri í þessum brellum?

„Þeir gengu kannski svolítið langt en þetta er út um allan heim, ég bendi á að Deutsche bank á í flest öllum stórfyrirtækjum heims og flest öll stórfyrirtæki eiga hlutabréf í Deutsche bank," segir Pétur.