Verður Þórir sá fyrsti sem nær gullnu þrennunni?

Þórir Hergeirsson, þjálfari kvennahandboltalandsliðs Noregs á Ólympíuleikunum í London, getur í dag endurskrifað sigursæla þjálfarasögu norska kvennalandsliðsins með því að verða fyrsti þjálfarinn sem vinnur öll þrjú stærstu mótinu í einni runu.

Þórir gerði norsku stelpurnar að Evrópumeisturum 2010 og Heimsmeisturum 2011 og vinni þær Svartfjallaland klukkan 19.30 í dag þá bætir hann Ólympíumeistaratitlinum við. Þórir hefur þegar unnið sex gull, þrjú silfur og eitt brons sem aðal- eða aðstoðarþjálfari norska liðsins.

Marit Breivik, fyrirrennari Þóris, gerði norska liðið að Ólympíumeisturum fyrir fjórum árum þá sem ríkjandi Evrópumeistari en ekki gekk eins vel á HM ári fyrr þegar norska liðið hlaut silfur á HM 2007.

Þórir var aðstoðarmaður Breivik frá 2001 til 2009 og norska liðið vann þá sjö verðlaun á stórmótum, fjögur gull og þrjú silfur, og þar á meðal var gull á Ólympíuleikunum í Peking fyrir fjórum árum síðan.

Síðan að Þórir tók við hefur norska liðið unnið verðlaun á öllum stórmótum og það breytist ekki núna. Liðið vann brons á fyrsta mótinu hans, HM 2009, en hefur síðan unnið tvö gull í röð á EM 2010 og HM 2011.