Mál Arnórs Ingva skýrast í vikunni

Keflvíkingum hefur borist tilboð frá norska félaginu Sandnes Ulf í Arnór Ingva Traustason. Félagið leikur í efstu deild norsku knattspyrnunnar.

„Þetta eru kannski lægri tölur en við höfðum hugsað okkur en þetta er í skoðun, það er ekkert tekið af borðinu strax," segir Þorsteinn Magnússon formaður knattspyrnudeildar Keflavíkur í samtali við Víkurfréttir.

Arnór Ingvi hefur vakið athygli fyrir frammistöðu sína á miðjunni hjá Keflvíkingum í sumar. Hann hélt í júlí til reynslu hjá norska félaginu ásamt Sigurbergi Elíssyni, liðsfélaga sínum hjá Keflavík. Greinilegt er að Arnór hefur staðið sig vel þann stutta tíma sem hann dvaldi ytra.

Haft er eftir Þorsteini að málið væri í höndum stjórnar knattspyrnudeildar og ákvörðun sé í fæðingu. Málin ættu að skýrast í vikunni en enn er óvíst hvenær Arnór héldi út ef af sölunni yrði.

Steinþór Freyr Þorsteinsson leikur með Sandnes Ulf en Úlfarnir eru nýliðar í efstu deild.