Gylfi: Viljum byggja upp jákvæðari stemningu fyrir landsliðinu

Gylfi Þór Sigurðsson segir að það sé eitt af markmiðum landsliðsins að byggja upp betri stemningu í kringum landsliðið en umræðan um það hefur verið neikvæð í ansi langan tíma.

"Okkur langar að byggja upp jákvæðari stemningu og betri umfjöllun um landsliðið. Síðustu undankeppnir hafa ekki verið góðar," sagði Gylfi Þór.

"Þegar liðið vinnur ekki neina leiki nennir fólk ekki að koma á völlinn. Alveg sama hvort það sé hjá landsliðið eða félagsliði. Það er bara þannig. Þegar liðinu fer að ganga betur þá nennir fólk að koma og það verður betri stemning. Það er því markmiðið núna að vinna einhverja leiki og gera smá gryfju hérna."

Mikil stemning skapaðist í kringum U-21 árs landsliðið þegar Gylfi og margir aðrir sem nú eru í A-landsliðinu voru þar.

"Aðalmálið er að vinna leiki og koma okkur í tækifæri í okkar riðlum. Þegar við fáum stig og spilum fínan bolta er ég sannfærður um að fólk fer að koma."

Ísland hefur ekki enn unnið leik undir stjórn Lars Lagerbäck en fær kjörið tækifæri í kvöld er það spilar gegn Færeyjum á Laugardalsvelli.

"Með fullri virðingu fyrir Færeyjum þá er þetta góður möguleiki og betri en gegn Frakklandi og Svíþjóð. Það hafa verið jákvæð batamerki síðan Lars tók við liðinu og vonandi heldur það áfram. Það vantar bara sigur og vonandi byrjum við á því sem fyrst."