Hafnarfjarðarbær vill funda með Landsneti vegna raflína

Skipulags- og byggingaráð Hafnarfjarðarbæjar hefur frestað ákvörðun um aðalskipulagsbreytingar varðandi Hamraneslínur og Suðurnesjalínu þar sem forsendur varðandi tímasetningu framkvæmda við Suðvesturlínu hafa breyst. Þetta kemur fram í fundargerð ráðsins síðan í gær. Þar kemur ennfremur fram að ráðið óski eftir fundi með Landsneti um framhald málsins áður en endanleg ákvörðun verður tekin.

Það var árið 2008 sem Landsnet óskaði eftir að leggja línurnar, meðal annars til þess að sinna orkuþörf álversins sem er í byggingu í Helguvík. Viðræður hafa í raun staðið yfir í fjögur ár en ágreiningurinn er helst sá að sveitarfélögin vilja að línurnar verði lagðar í jörðu, Landsnet mótmælir því og heldur því fram að slíkt sé of dýrt.

Málið hefur haft mikil pólitísk áhrif í Vogum en þar varð uppi fótur og fit á síðasta ári. Þá sprakk meirihlutinn vegna ágreinings um það hvort leggja ætti línuna í jörð eða ekki. Stefna núverandi meirihluta er einmitt að leggja línur í jörðina.

Í fundargerð Skipulags- og byggingarráðs Hafnarfjarðar segir að ráðinu hafi borist póstur frá lögfræðingi umhverfisráðuneytisins í síðustu viku, þar var farið fram á að bærinn tæki endanlega afstöðu til skipulagsins eða drægi það til baka.

Í fundargerðinni segir ennfremur að aðalskipulagsbreyting hafi verið samþykkt í bæjarstjórn Hafnarfjarðarbæjar í október árið 2010. En síðan var umhverfisráðuneytið beðið um að fresta afgreiðslu málsins þar sem óljóst var hvort framkvæmdir Landsnets yrðu eins og samkomulagið gerði ráð fyrir. Árið síðar taldi Skipulags- og byggingarráð réttast að samningar við Landsnet yrðu skoðaðir heildstætt, meðal annars vegna línustæða, áður en afstaða væri tekin til beiðni Landsnets um frekari framkvæmdir.

Því er ljóst að enn frekari bið verður á framkvæmdum sem Landsnet hefur beðið í fjögur ár eftir að leggjast í. Talið er að lagning línanna taki um tvö ár verði framkvæmdir samþykktar.