Stjórn N1 segir að virk samkeppni sé á markaði

Stjórn N1 segir að samkeppni félagsins við önnur olíufélög sé mjög virk og hafi meðal annars birst að undanförnu í háum tímabundnum afsláttum, aukinni þjónustu og afsláttum til neytenda í gegnum tryggðarkerfi.

Þetta kemur fram í yfirlýsingu sem stjórnin sendi frá sér í dag, en Hermann Guðmundsson, fyrrverandi forstjóri, sagði við fjölmiðla í dag að bensínverð á Íslandi gæti verið lægra, en olíufélögin geti hvorki né vilji lækka verðið vegna mikillar skuldsetningar og góðrar arðsemi sem hátt bensínverð skilar.

Stjórn N1 telur hins vegar mikilvægt að eðlileg samkeppni ríki á eldsneytismarkaði og telur að svo hafi verið. „Stjórnin, í samvinnu við nýráðinn forstjóra, stjórnendur og starfsfólk um land allt, mun tryggja að fyrirtækið láti ekki sitt eftir liggja í áframhaldandi samkeppni og verði í fararbroddi heilbrigðra viðskiptahátta," segir í tilkynningu frá stjórninni.