Krónan styrkist

Gengi krónunnar hefur styrkst um hátt í 11% á síðustu fimm mánuðum og hefur ekki verið sterkara síðan í byrjun síðasta árs. Mikil árstíðarsveifla er í gengi krónunnar og því líklegt að hún muni veikjast aftur með haustinu.

Þetta kemur fram í morgunkorni Greiningardeildar Íslandsbanka. Gengisvísitala krónunnar fór hæst í rúm 229 stig undir lok mars en var klukkan níu í morgun rúm 207 stig sem er hátt í ellefu prósenta styrking á tæpum fimm mánuðum. Mest hefur styrkingin orðið síðustu vikurnar en frá því í byrjun júlí hefur hún styrkst um sjö prósent. Lægri gengisvísitala gerir það að verkum að gengi krónunnar gagnvart helstu viðskiptamyntum landsins lækkar gagnvart Íslendingum, þannig kostar evran nú tæpar 148 krónur en var á rúmar 159 krónur í byrjun júlí og sömuleiðis kostar Bandaríkjadalur nú tæpar 120 krónur en var á 129 krónur um miðjan júlí.

Gengi krónunnar er nú fimm prósentum hærra en það var á sama tíma í fyrra en greiningardeild Íslandsbanka telur ekki útilokað að krónan muni styrkjast enn frekar á næstu vikum en í fyrra styrktist krónan fram í lok október.

Mikil árstíðarbundin sveifla er því í gengi krónunnar okkar og það má helst rekja til gjaldeyrisflæði vegna vöru- og þjónustuskipta innan haftanna og þar hefur straumur erlendra ferðamanna til landsins mikið að segja. Það er hins vegar líklegt að krónan gefi eftir að nýju yfir vetrartímann í takti við óhagstæðari vöru- og þjónustujöfnuð.

Þá telur greiningardeildin líklegt að þar sem sveiflan er svona sterk þá sé líklegt að fyrirtæki í vöru og þjónustuviðskiptum reyni í auknum mæli að verja sig fyrir henni til dæmis með gerð framvirkra gjaldeyrissamninga sem eru leyfilegir innan haftanna svo lengi sem þeir tengjast viðskiptum með vöru og þjónustu.