Leikmenn AG söfnuðu peningum til þess að bjarga félaginu

Leikmenn, þjálfarar og styrktaraðilar danska handknattleiksfélagsins AG Kaupmannahafnar voru vel á veg komnir með að bjarga félaginu. Þetta segir markvörðurinn Kasper Hvidt í samtali við Jyllands-Posten.

Jesper Nielsen, aðaleigandi AG, fór á þriðjudagsmorgun fram á gjaldþrotaskipti danska félagsins. Tíðindin bárust leikmönnum félagsins í kjölfarið. Stór hluti hópsins leikur með landsliðum sínum á Ólympíuleikunum en aðrir leikmenn dvöldu í æfingabúðum danska félagsins á Kanaríeyjum. Þeir neituðu að játa sig sigraða.

Með farsímann að vopni hringdu þeir heim til Danmerkur en fyrsta verkefni var að safna tveggja milljóna króna þátttökugjaldi í efstu deild danska félagsins. Gjaldið átti að greiðast fyrir miðvikudaginn 1. ágúst.

Að sögn Hvidt reyndist lítið vandamál að afla fjárins. Leikmennirnir voru klárir í að greiða það sjálfir en styrktaraðilar hafi þó boðist til að greiða reikninginn.

„Við fundum fyrir miklum stuðningi frá styrktaraðilunum. Stuðningurinn og loforð um greiðslur sem við fengum á aðeins hálfum degi segir allt um glæsileika AG Kaupmannahafnar og framtíðarmöguleika þess," segir Hvidt.

Seinni part miðvikudags bárust þau tíðindi að samkvæmt reglum danska handknattleikssambandsins hæfi félag sem færi fram á gjaldþrotaskipti sjálfkrafa leik í C-deild.

Að sögn danska markvarðarins, sem lagt hefur landsliðsskóna á hilluna, voru styrktaraðilar tilbúnir að veita enn meira fé til félagsins en gert hafði verið í eigendatíð Jesper Nielsen.

„Því er virkilega svekkjandi að það hafi ekki gengið eftir vegna regluverks," segir Hvidt.

„Hefði Nielsen-fjölskyldan látið nægja að fresta greiðslu á reikningum þá hefði félagið átt möguleika. Ég er mjög mjög bitur og pirraður. Nú er félagið AG Kaupmannahöfn steindautt en þetta hefði ekki þurft að enda svona. Við höfðum möguleika á að halda áfram án fjárhagslegs stuðnings Nielsen-fjölskyldunnar. Ég er 100 prósent viss um það," segir Hvidt.

Hvidt segist sjálfur hafa rætt við nokkra styrktaraðila en starfsmenn félagsins hafi haft samband við aðra. Í ljós kom að ýmislegt hafði verið reynt til þess að bjarga félaginu en þó kom annað undarlegt í ljós.

„Einn stór styrktaraðili hafði ekki heyrt neitt frá AG Kaupmannahöfn síðan Jesper Nielsen hætti afskiptum um miðjan júlí," segir Hvidt. Skrýtið í ljósi þess að framkvæmdastjóri félagsins og hægri hönd Nielsen, Sören Colding, hefði eðlilega átt að leita allra leiða til að halda rekstri félagsins gangandi.

„Ég hef enga hugmynd. Þín spurning gæti allt eins verið mín. Þetta er skrýtið," segir Hvidt aðspurður um hvers vegna Colding hafði ekki samband við styrktaraðilann mikilvæga.

Hvidt, sem nú er atvinnulaus líkt og aðrir leikmenn Kaupmannahafnarliðsins, hrósar Nielsen um leið og hann gagnrýnir hann.

„Hann og fjölskylda hans hafa gert vel í því að koma AG Kaupmannahöfn á toppinn. Leikmenn og hæfileikaríkt starfsfólk félagsins á þó ekki síður hrós skilið. Mér fannst við eiga skilið tækifæri til þess að rétta skútuna við. Tækifærið var raunverulega fyrir hendi," segir Hvidt.



Frétt danska vefmiðilsins má sjá hér.