Þjálfari Ungverja ætlar að finna svar gegn íslensku vörninni

Lajos Mocsai, landsliðsþjálfari Ungverjalands, ætlar að nýta tímann fram að leik sinna manna gegn Íslandi í fjórðungsúrslitunum vel.

Ungverjar unnu í morgun þriggja marka sigur á Serbíu, 26-23, og tryggðu sér þar með fjórða sæti B-riðils. Þar sem Ísland er búið að tryggja sér sigur í A-riðli er ljóst að þessi tvö lið munu mætast í 8-liða úrslitunum á miðvikudaginn.

„Ég vil byrja á að óska Íslendingum til hamingju með frábært handboltalandslið. Liðið er framúrskarandi gott," sagði hann við blaðamann Vísis eftir leikinn í morgun.

„Allir leikmenn Íslands eru mjög öflugir - miklir kraftakallar en líka afar vel skipulagðir."

Mocsai náði að stilla saman varnarleik Ungverja í seinni hálfleik en það lagði grunninn að sigrinum, ásamt markvörslu Nandor Fazekas og frammistöðu Tamas Mocsai í sókninni en sá skoraði níu mörk í dag. Þess má geta að þeir Lajos og Tamas eru feðgar.

„Ég vona að við höfum í dag náð að brjótast í gegnum ákveðinn múr," sagði hann Ungverjar hafa tapað þremur leikjum á mótinu - gegn Danmörku, Spáni og Króatíu.

„Við spiluðum vel í dag og ég vona að við getum nýtt okkur þennan meðbyr. Íslendingar hafa spilað mjög góðan varnarleik á mótinu en öll lið eru með sínar aðferðir til að hafa betur gegn andstæðingnum," sagði hann.

„Ég hef nú næstu tvo daga til að undirbúa mitt lið fyrir leikinn og verður það mitt að finna svar gegn íslensku vörninni."