Vegir eru hrörlegir vegna bágrar stöðu ríkissjóðs

Vegir landsins eru margir hverjir orðnir hrörlegir vegna lítils viðhalds að mati vegamálastjóra. Sérstaklega er vegurinn austan Selfoss lélegur. Ástæðan er forgangsröðun í viðhaldi vegna lélegrar stöðu ríkissjóðs.

Fórnarlömb bágrar stöðu ríkissjóðs eru nokkur. Um það er ekki deilt. Heilbrigðiskerfið er eitt þeirra og vegakerfið annað.

Morgunblaðið sló því í uppá forsíðu í dag að komið væri að þolmörkum í vegakerfinu.

En hversu slæm er staðan? Að sögn Hreins Haraldssonar vegamálastjóra er vegurinn fyrir austan Selfoss er orðinn bældur og skældur. Þá eru ókláraðir malarspottar víða.

„Við getum tiltekið nokkra vegi, t.d. Suðurlandsveg fyrir austan Selfoss. Við getum tekið vegi á Norðurlandi og Norðausturlandi líka. Svo það eru svona ákveðnir kaflar. Það er ekki eins og landið allt sé að fara í handaskolum heldur eru þetta ákveðnir kaflar á kerfinu," segir hann.

Það eru hins vegar kaflar þar sem umferð er mikil, eins og austan við Selfoss.

Þá mér nefna vegi að vinsælum ferðamannastöðum eins og Einholtsveg, Þingskálaveg og Þórsmerkurveg.

Á Vegagerðina er niðurskurðarkrafa í fjárlögum næsta árs, en hún mun ekki birtast í viðhaldi á vegum og framkvæmdum. Því Alþingi ákvað að gefa í sl. vor og auka viðhald á vegum.

„Þannig að ástandið mun batna, bæði í viðhaldi, þjónustu og einhverjum nýframkvæmdum á næsta ári," segir Hreinn.

Þrátt fyrir stöðu ríkissjóðs ákvað löggjafinn í vor að lána 9 milljarða fyrir Vaðlaheiðargöngum, en framkvæmdir þar hófust í dag eins og við sögðum ykkur frá hér áðan.

Hvað finnst þér um að ríkisstjórnin ætli að lána 8,7 milljarða til að byggja ein göng fyrir norðan á sama tíma og mikilvægum stofnbrautum er ekki haldið við? spyr fréttamaður.

„Ég á mjög erfitt með að bera þetta saman. Þetta er alveg gerólíkt. Annars vegar eru teknar ákvarðanir varðandi hið almenna vegakerfi, og ekki greiddar með lánum heldur af mörkuðum tekjustofnum umferðar. Vaðlaheiðargöngin eru allt annað dæmi og engar forsendur til að færa þarna fé á milli úr Vaðlaheiðargöngum í viðhald og þjónustu. En auðvitað er líklega öllum ljóst að viðhald veganna er yfirleitt mun mikilvægara en einstakar framkvæmdir," segir Hreinn.