Brasilískur júdókappi fær nýjan verðlaunapening eftir sturtuslys

Brasilíski júdókappinn Felipe Kitadai braut fyrir slysni bronsverðlaunapening sinn í sturtu. Vefurinn Globoesporte.com greinir frá þessu.

Kitadai, sem vann til bronsverðlauna í 60 kg flokki á laugardag, missti verðlaunapeninginn í gólfið á meðan hann var í sturtu. Hann segist hafa verið svo himinlifandi með verðlaunin að hann tók þau með sér hvert sem hann fór.

„Ég tók hann meira segja með mér í sturtuna. Ég var hinsvegar svo hræddur um að hann myndi blotna að ég stakk honum í munninn meðan ég sápaði mig. En hann rann úr munninum á mér," sagði Kitadai.

Við fallið brotnaði litla gjörðinn sem tengir verðlaunapeninginn við hálsborðann. Auk þess kom lítil dæld í peninginn.

Að sögn Globoesporte.com mun Alþjóðaólympíunefndin veita Brasilíumanninum nýjan verðlaunapening.