Stjarnan og Þróttur berjast um sögulegt sæti í bikarúrslitum

Stjarnan og Þróttur mætast í undanúrslitum Borgunarbikars karla í knattspyrnu á Samsung-vellinum í Garðabæ í kvöld. Það lið sem sigrar tryggir sér sæti í úrslitaleik bikarsins í fyrsta skipti.

Heimamenn í Stjörnunni verða að teljast mun líklegri aðilinn fyrirfram. Liðið er í toppbaráttu efstu deildar karla á meðan gengi Þróttar í næstefstu deild hefur verið upp og ofan. Liðið situr sem stendur í 7. sæti deildarinnar.

Þróttarar byggja þó á því að hafa slegið bæði Selfoss og Val úr leik í keppninni en liðin leika bæði í efstu deild. Valsmenn lágu 2-1 eftir framlengdan leik en Selfyssingar mættu ofjörlum sínum á Valbjarnarvellinum í 3-0 tapi.

Stjarnan sló út neðrideildarlið Reynis og Gróttu úr leik áður en Framarar lágu 2-1 í Garðabænum í átta liða úrslitum.

Liðin mættust síðast í keppnisleik í efstu deild karla sumarið 2009. Báðum leikjunum lauk með stórsigri Stjörnunnar, annars vegar 6-0 og hins vegar 5-1. Stjarnan hafnaði í 7. sæti efstu deildar það sumar en Þróttur féll úr deildinni.

Henryk Bödker stóð í marki Þróttara í 6-0 tapinu í Laugardalnum en Daninn er nú markvarðarþjálfari Stjörnunnar. Hallur Hallsson, fyrirliði Þróttara, er eini núverandi leikmaður Þróttar sem spilaði leikina árið 2009. Hallur er þó í leikbanni og því ekki til taks í kvöld.

Ellert Hreinsson, Halldór Orri Björnsson, Tryggvi Sveinn Bjarnason auk bræðranna Daníels og Jóhanns Laxdal komu við sögu í leikjunum og eiga því góðar minningar. Raunar skoruðu allir nema Daníel í leikjunum tveimur.

Þróttarar hafa enduheimt þrjá uppalda leikmenn sem verða vafalítið í leikmannahópi félagsins í dag. Ber þar helst að nefna Hjálmar Þórarinsson og Sigmund Kristjánsson sem eiga báðir fjölmarga landsleiki með yngri landsliðum Íslands.

Leikur Stjörnunnar og Þróttar er í beinni útsendingu á Stöð2 Sport í kvöld en leikurinn hefst klukkan 19.15.