Elfar Freyr samdi við Stabæk

Elfar Freyr Helgason hefur gengið til liðs við norska úrvalsdeildarliðið Stabæk og mun spila með liðinu til loka leiktíðarinnar.

Elfar var síðast á mála hjá AEK Aþenu en fékk sig lausan frá félaginu í sumar. Hann fékk lítið að spila í Grikklandi en félagið á þar að auki í miklum fjárhagskröggum.

„Ég veit að Veigar Páll Gunnarsson hefur spilað með Stabæk og að Bjarni Eiríksson spili hér nú. Ég er ánægður með að vera kominn hingað," sagði hann í viðtali á heimasíðu félagsins.

Elfar Freyr er uppalinn Bliki og varð bæði Íslands- og bikarmeistari með liðinu á sínum tíma.