Rohde á láni hjá Breiðabliki út tímabilið

Danski framherjinn Nichlas Rohde spilar með karlaliði Breiðabliks út leiktímabilið. Þetta staðfesti Einar Kristján Jónsson formaður knattspyrnudeildar Breiðabliks í samtali við Vísi í dag.

Rohde, sem er samningsbundinn dönsku meisturunum í FC Nordsjælland, æfði í síðustu viku með Breiðabliki og þótti standa sig vel. Hann er fæddur árið 1992 og hefur spilað átta leiki fyrir aðallið Nordsjælland og skorað í þeim eitt mark.

Maximilian Knuth, þýskur miðjumaður sem einnig æfði með Blikum í síðustu viku, stóð ekki undir væntingum fékk ekki samningstilboð hjá félaginu.

Breiðablik mætir ÍBV í 13. umferð Pepsi-deildar karla á sunnudaginn og reiknað er með því að Rohde spili þann leik. Sömu sögu er að segja um Englendinginn Ben Everson sem kom til Blika frá Tindastóli á dögunum.