Arion banki hefði átt að skipta Högum upp í fleiri fyrirtæki

Samkeppniseftirlitið telur að bankar hefðu átt að nýta betur tækifærið sem hrunið veitti til þess að skipta upp stórum, mikilvægum fyrirtækjum og fjölga með þeim hætti keppinautum á mörkuðum. Slíkt hefði stuðlað að aukinni samkeppni og þannig leitt til meiri hagsældar til lengri tíma litið og aukins ávinnings fyrir bankana heldur en skammtímaviðhorf um hærra söluandvirði stærri einingar.

Samkeppniseftirlitið greindi frá því í dag að það hyggst rannsaka viðskiptakjör birgja til ýmissa matvöruverslana. Í skýrslu, sem var gerð um síðustu áramót og liggur til grundvallar rannsóknarinnar, segir að færa megi rök fyrir því að þetta mat Samkeppniseftirlitsins um að skipta hefði átt fyrirtækjum upp eigi við um Haga og ýmis önnur fyrirtæki á öðrum mörkuðum. Taka beri þó fram að sala verslana 10-11 úr Högum á árinu 2011 hafi verið til bóta enda þótt ekki séu vísbendingar um að salan hafi í grundvallaratriðum breytt stöðu Haga á markaðnum. Eins og kunnugt er tók Arion banki Haga yfir um það leyti sem Baugur fór í þrot.

Þá segir Samkeppniseftirlitið að straumhvörf hafi orðið á dagvörumarkaðnum með auknum styrk lágvöruverslana. Þannig hafi hlutur Bónuss aukist mjög mikið innan Haga en hlutur Hagkaupa minnkað að sama skapi. Hlutur Krónunnar hefur aukist hjá Kaupási en hlutur Nóatúns minnkað. „Hlutur lágvöruverðsverslana í heild var um 20% árið 1999 en hlutur þeirra var orðinn 63% árið 2010. Hlutur allra annarra tegunda dagvöruverslana hefur minnkað á sama tímabili, þó langmest hlutdeild stórmarkaða og almennra dagvöruverslana sem höfðu yfirgnæfandi hlutdeilt árið 1999, eða 62%, en 27% árið 2010. Hlutur klukkubúða minnkaði úr 16% í 8% á sama tímabili og lítilla matvörubúða úr 3% í 1%. Þessi þróun hefur verið mjög hröð en athyglisvert er að þróun í átt til aukinnar hlutdeildar lágvöruverslana stöðvaðist tímabundið á mestu hagvaxtarárunum fyrir hrun frá 2005 - 2007 og aftur á árinu 2010," segir í skýrslunni.