Óvíst hvort Besta útihátíðin verður aftur

Aðstandendur Bestu útihátíðarinnar eru ekki búnir að finna nýtt nafn á útihátíðina. Neytendastofa komst að þeirri niðurstöðu að hátíðin mætti ekki nefnast „Besta útihátíðin" þar sem ekki væru neinar sannanir fyrir því að hátíðin væri raunverulega best.

„Það er ekki einu sinni víst að hátíðin verði aftur skilurðu," segir Haraldur Ási Lárusson, aðstandani hátíðarinnar „Það að byrja upp á nýtt, með nýtt nafn er bara eins og að byrja á byrjunarreit. Og þá byrjar maður bara að tapa aftur." Því er allt í lausu lofti þar á bæ og menn að velta fyrir sér hver næstu skref verða.

Besta útihátíðin hefur verið haldin síðustu þrjú árin. Að sögn Haralds gekk allt eins og í sögu þetta árið. „Yfirlögregluþjónninn og yfirlæknirinn sögðust myndu sakna okkar eftir helgina, þetta var svo vel skipulagt. Allt gekk upp." Haraldur áætlar að um 5000 manns hafi verið á svæðinu.

Haraldur er mjög svekktur vegna úrskurðar Neytendastofu. „Ég skal segja þér söguna af því hvernig þetta gerðist," segir hann. „Þetta byrjaði með því að við vorum kærðir fyrir hátíðina í fyrra. Við andmæltum því og fengum að hafa nafnið fram yfir hátíð. Í ágúst höfðum við aftur samband og tékkuðum á stöðunni. Fengum þau svör að málið væri í vinnslu og við yrðum látnir vita."

„Eftir það var ekkert samband við okkur haft fyrr en í maí þegar við byrjuðum að auglýsa fyrir hátíðina. Þá kom bréf inn um lúguna hjá mér um að það hefði verið úrskurðað 29. mars að við mættum ekki nota nafnið. Við náðum að berja það í gegn að við fengum að halda nafninu fram yfir hátíð. Nú erum við bara dálítið í lausu lofti."