Umfjöllun og viðtöl: KA - Grindavík 2-3 | Ameobi hetjan

Grindvíkingar gerðu góða ferð á Akureyri og unnu KA með þremur mörkum gegn tveimur í háspennuleik á Akureyrarvelli í kvöld. Grindvíkingar eru því komnir áfram í 8-liða úrslitin á kostnað Akureyringa. Tomi Ameobi var hetja Grindvíkinga en hann skoraði sigurmarkið á síðustu mínútu uppbótartímans.

Grindvíkingar byrjuðu leikinn af miklum krafti og tóku öll völd á vellinum á fyrstu mínútu. Það leið ekki langur tími þar til fyrsta markið kom. Björn Berg Bryde skallaði þá hornspyrnu Óla Baldurs Bjarnasonar í netið á sjöundu mínútu. Gunnar Valur Gunnarsson, varnarmaður norðanmanna, jók svo forystuna fyrir gestina þegar hann ætlaði að hreinsa skot Scott Ramsay frá en skaut boltanum þess í stað í eigið net.

Grindvíkingar héldu áfram að pressa en undir lok fyrri hálfleiks náðu KA menn að minnka muninn þvert gegn gangi leiksins. Jóhann Helgason skallaði þá fyrirgjöf Hallgríms Steingrímssonar glæsilega í netið. Óskar Pétursson markvörður gestanna fór í glannalegt úthlaup og reyndi að kýla fyrirgjöf Hallgríms en kýldi þess í stað markaskorarann Jóhann í andlitið og Jóhann þurfti að fara meiddur af velli.

Eftir það var einstefna að marki Grindavíkur. Bjarki Baldvinsson fékk dauðafæri á 60. mínútu en lét Óskar verja frá sér. Þá klúðraði Brian Gilmour vítaspyrnu á 70 mínútu og virtist sem boltinn vildi ekki inn fara hjá KA-mönnum.

Það var svo á 88. mínútu sem pressan skilaði sér. Varamaðurinn Gunnar Örvar Stefánsson slapp einn í gegn og kláraði færið glæsilega, einn gegn Óskari. En þá var eins og Grindvíkingar vöknuðu af værum svefni því síðustu mínúturnar lágu þeir á heimamönnum. Eftir langt innkast frá öðrum varamanni, Hafþóri Ægi Vilhjálmssyni, kom sigurmark gestanna. Tomi Ameobi var allt í einu einn og óvaldaður á markteig Norðanmanna og setti knöttinn auðveldlega í netið framhjá Sandor Matus. Sigur Grindvíkinga staðreynd og þeir fara því áfram í 8-liða úrslitin.

Bjarki Baldvinsson: Einbeitingarleysi kostaði sigurinnBjarki Baldvinsson leikmaður KA var svekktur í leikslok.

„Þetta var mjög svekkjandi, sérstaklega eftir að við áttum seinni hálfleikinn algjörlega. Við byrjuðum reyndar hrikalega og fyrsti hálftíminn var hræðilegur. Þetta fór svo að ganga eftir að við minnkuðum muninn," sagði Bjarki sem sá vel hvað gerðist í sigurmarki gestanna.

„Besti framherjinn þeirra var aleinn og þetta einbeitingarleysi kostaði okkur sigurinn. Við verðum að bæta það fyrir næsta leik," sagði Bjarki.

Bikarævintýri norðanmanna er búið en næsta verkefni KA er leikur gegn Þrótti R. á Valbjarnarvelli á laugardaginn.

„Við verðum bara að halda áfram í deildinni núna. Unnum góðan sigur á Þór hér í síðustu viku og við stefnum á þrjú stig á Valbjarnarvelli um helgina, það er ekki spurning" sagði Bjarki að lokum.

Guðjón Þórðarson: Akureyri yljar mér um hjartaræturGuðjón Þórðarson þjálfari Grindvíkinga var að vonum sáttur í leikslok.

„Byrjunin lofaði góðu og eftir að hafa tekið 2-0 forystu vildi maður ganga ennþá lengra og setja þriðja markið því í stöðunni 3-0 þá hefði verið mjög erfitt fyrir KA að koma til baka. Við gáfum eftir og þeir komust inn í leikinn. Eftir að þeir komust í 2-1 var ljóst að leikurinn hafði breyst og við áttum í meiri erfiðleikum en fyrsta hálftímann þar sem við höfðum öll tök á vellinum," sagði Guðjón.

Spil Grindvíkinga gjörbreyttist eftir að heimamenn minnkuðu muninn. Guðjón var ekki sáttur við hvernig hans menn byrjuðu seinni hálfleikinn.

„Menn hættu að spila boltanum. KA menn voru í eltingarleik í fyrri hálfleik en þegar þessi 2-1 staða kemur þá er eins og við förum í stress. Þú sérð hvernig seinni hálfleikurinn byrjar. Við tökum miðju og gefum hann til baka, svo lengra til baka og því næst alveg aftur á markmanninn . Hann sparkar fram og við missum boltann útaf," sagði Guðjón sem var ánægður með framlag sinna manna.

„Ég er ánægður með karakterinn og það er kaldhæðnislegt að eftir að við fáum á okkur jöfnunarmarkið þá fáum við 2-3 fín færi til að vinna leikinn á þeim 5 mínútum sem eftir voru. Svo kom sigurmarkið í lokin eftir eina af þessum sóknum," sagði Guðjón sem hefur áður þjálfað KA sem og KR sem eru næstu andstæðingar Grindvíkinga.

„Þetta eru KA og KR, lið sem ég hef þjálfað og á margar góðar minningar frá. Akureyri yljar mér alltaf um hjartarætur þegar ég kem hingað. Ég veit að það verður erfiður dagur hjá mér að mæta á KR-völlinn á sunnudagseftirmiðdag en ég hlakka til og það verður bara gaman," sagði sigurreifur Guðjón Þórðarson í leikslok.