Krefjast þess að gamli Landsbankinn viðurkenni sektarkröfu

Samkeppniseftirlitið krefst þess að sekt sem lögð var á gamla Landsbankann verði viðurkennd sem forgangskrafa en ekki almenn krafa.

Sektin var lögð á bankann vegna samruna á Toyota og tengdum fyrirtækjum sem ekki var tilkynntur Samkeppniseftirlitinu. Sektin sem Samkeppniseftirlitið lagði á nam 40 milljónum en áfrýjunarnefnd lækkaði sektina niður í 7 1/2 milljón. Slitastjórn gamla Landsbankans setti kröfuna í flokk almennra krafna. Við þetta vill Samkeppniseftirlitið ekki una og var mál vegna þessa þingfest í Héraðsdómi Reykjavíkur í dag.

„Við getum ekki fallist á það og þess vegna er til þessa máls stofnað, til þess að láta reyna á þá röðun á kröfunni," segir Páll Gunnar Pálsson, forstjóri Samkeppniseftirlitsins. „Vegna þess að við lítum á þetta þrotabú sem fyrirtæki í atvinnurekstri hér og við getum ekki unað því að þetta fyrirtæki þurfi ekki að standa skil á sektum samkeppnisyfirvalda eins og aðrir," segir Páll Gunnar.