Lífeyrissjóðirnir munu ekki fá að fjárfesta að vild í útlöndum

Lífeyrissjóðirnir munu ekki geta fjárfest að vild erlendis við afnám hafta þar sem slíkt gæti grafið undir krónunni og rýrt eignir lífeyrissjóðanna. Þetta kom fram í máli Más Guðmundssonar seðlabankastjóra á fundi í bankanum í síðustu viku.

Gjaldeyrishöftin eru helsti áhættuþátturinn í íslenska hagkerfinu þessi misserin, samkvæmt skýrslu Seðlabanka Íslands um fjármálastöðugleika sem kom út í síðustu viku. Margumtalaðar aflandskrónur, þ.e. íslenskar krónur í eigu erlendra aðila sem gætu farið hratt úr íslenska hagkerfinu við afnám hafta, eru ekki eina vandamálið þegar kemur að höftunum, en sá vandi er þó metinn á bilinu 400 til 600 milljarðar króna eins og staða mála er í dag.

Þannig hafa safnast upp miklar fjárhæðir á innlánsreikningum í eigu íslenskra lífeyris- og verðbréfasjóða frá því höftin voru sett, eða hátt í 200 milljarðar króna. Lífeyrissjóðir eru með langstærstan hluta af þeirri upphæð með tæplega 160 milljarða króna.

Már Guðmundsson seðlabankastjóri sagði á fundi um fjármálstöðugleikaskýrslu Seðlabankans í síðustu viku að lífeyrissjóðirnir myndu ekki fá að fjárfesta að vild í útlöndum, þar sem hætta væri á því að slíkt myndi grafa undan krónunni.

Fjárfestingum sjóðanna erlendis yrði stýrt þannig að fjármálastöðugleika yrði ekki ógnað, en Már sagði enn fremur að of hratt útflæði á fjármagni lífeyrissjóða gæti minnkað eignir sjóðanna hér þar sem slíkt gæti kallað fram gengisfall og verðbólgu. Endanleg útfærsla á því hvernig þessum fjárfestingum verður stýrt liggur þó ekki fyrir, enda áætlun seðlabankans um afnám hafta enn í gangi.

Heildareignir lífeyrissjóðanna eru nú ríflega 2.200 milljarðar króna samkvæmt upplýsingum Seðlabankans um stöðu lífeyrissjóðanna, eða sem nemur um 140 prósentum af árlegri landsframleiðslu.

Sjá má upplýsingar um stöðu lífeyrissjóðanna hér.