Aflaverðmætið jókst um 9,7 milljarða milli ára

Aflaverðmæti íslenskra skipa nam 47,3 milljörðum króna á fyrstu þremur mánuðum ársins samanborið við 37,6 milljarða kr. á sama tímabili í fyrra. Aflaverðmæti hefur því aukist um 9,7 milljarða kr. eða 25,8% á milli ára.

Þetta kemur fram á vefsíðu Hagstofunnar. Þar segir að aflaverðmæti botnfisks var 29 milljarðar kr. og jókst um 24,2% frá sama tíma í fyrra þegar aflaverðmætið nam 23,3 milljörðum kr.

Verðmæti þorskafla var um 16,1 milljarður kr. og jókst um 17,6% frá fyrra ári. Aflaverðmæti ýsu nam 4,5 milljörðum kr. og jókst um 32,3% en verðmæti karfaaflans nam 4,8 milljörðum kr., sem er 70% aukning frá fyrstu þremur mánuðum ársins 2011. Verðmæti ufsaaflans jókst um 38,1% milli ára og nam 1,7 milljörðum króna í janúar til mars 2012.

Verðmæti uppsjávarafla nam um 14,7 milljörðum króna í janúar til mars 2012, sem er um 35% aukning frá fyrra ári. Sú aukning skýrist að mestu af loðnuafla að verðmæti 13 milljörðum króna samanborið við 8,7 milljarða kr. á fyrstu þremur mánuðum ársins 2011. Aflaverðmæti flatfisksafla nam um 3 milljörðum króna, sem er 4,3% aukning frá janúar til mars 2011.

Verðmæti afla sem seldur er í beinni sölu útgerða til vinnslu innanlands nam 27,2 milljörðum króna og jókst um 25,7% miðað við fyrstu þrjá mánuði ársins 2011. Verðmæti afla sem keyptur er á markaði til vinnslu innanlands jókst um 12,9% milli ára og var tæplega 6,1 milljarður króna.

Aflaverðmæti sjófrystingar nam tæpum 12,3 milljörðum kr. í janúar til mars og jókst um 39,2% milli ára en verðmæti afla sem fluttur er út óunninn nam rúmum 1,5 milljörðum króna, sem er 9,1% aukning frá árinu 2011.