Real Madrid reis upp frá dauðum og jafnaði einvígið við Barcelona

Ótrúlegur endasprettur tryggði Real Madrid 75-69 sigur á Barcelona í öðrum leik liðanna í úrslitaeinvíginu um spænska meistaratitilinn í körfubolta í gærkvöldi en Real vann níu stigum undir þegar sex mínútur voru eftir. Real vann hinsvegar lokakafla leiksins 19-4 og jafnaði einvígið.

Barcelona-liðið var í góðum málum þegar sex mínútur voru til leiksloka en liðið var þá 65-56 yfir. Real Madrid vann hinsvegar næstu fimm mínútur 14-1, komst í 70-66 og snéri leiknum sér í hag.

Barcelona vann dramatískan eins stigs sigur á flautukörfu í fyrsta leiknum en sá leikur fór einnig fram í Barcelona. Næstu tveir leikir eru síðan spilaðir á heimavelli Real Madrid.

Leikurinn var jafn í hálfleik, 40-40, en Barcaelona tók frumkvæðið með því að vinna þriðja leikhlutann 16-9. Börsungar virtust síðan vera með leikinn í góðum höndum þegar leikur liðsins hrundi í leikslok.

Sergio Rodríguez skoraði 14 stig fyrir Real Madrid og króatíski miðherjinn Ante Tomic var með 12 stig og 9 fráköst. Jaycee Carroll og Nikola Mirotić skoruðu báðir 10 stig.

Slóvenski kraftframherjinn Erazem Lorbek fór á kostum í liði Barca í kvöld og skoraði 22 stig á aðeins 29 mínútum en þeir Fran Vázquez og Juan Carlos Navarro skoruðu báðir 11 stig.