Seinna mark KR var sjálfsmark Gunnleifs

Þorvaldur Árnason, knattspyrnudómari, hefur nú staðfest með skýrslu sinni að síðara mark KR-inga gegn FH í gær var sjálfsmark markvarðarins Gunnleifs Gunnleifssonar.

Í fyrstu var talið að Kjartan Henry Finnbogason hafi skorað markið enda átti hann skotið sem hafnaði í netinu. Hins vegar telur Þorvaldur að boltinn hafi ekki verið að stefna á markið fyrr en hann breytti um stefnu á Gunnleifi.

Kjartan Henry er þó enn markahæsti leikmaður deildarinnar en hann hefur skorað fimm mörk í jafn mörgum leikjum fyrir KR-inga.

Atli Jóhannsson, Stjörnunni, og Björn Daníel Sverrisson, FH, koma næstir með þrjú mörk hvor.