Fyrsta þrenna KR-ings úr vítum

Kjartan Henry Finnbogason endurskrifaði glæsilega sögu KR á KR-vellinum í gær þegar hann skoraði þrennu af vítapunktinum í 3-2 sigri á ÍBV í 3. umferð Pepsi-deildar karla. Ólafur Brynjar Halldórsson, tölfræðingur KR-inga, hefur komist að því að þetta sé fyrsta þrenna KR-ings úr vítum í efstu deild. Þ:etta kemur fram á heimasíðu KR-inga.

Fjórir KR-ingar höfðu mest skorað áður tvö mörk úr vítum í deildarleik. Gunnar Guðmannsson skoraði tvö úr vítum í 4-2 sigri á Víkingi árið 1956. Pétur Pétursson skoraði tvisvar úr vítum í 3-0 sigri á Völsungi árið 1988 og Einar Þór Daníelsson skoraði tvö af þremur mörkum sínum úr vítum í 4-0 sigri á ÍA árið 1997. Árið 2000 skoraði Andri Sigþórsson svo tvö mörk úr vítaspyrnum í 3-2 sigri á Breiðabliki.

Kjartan Henry skoraði úr fyrstu tveimur vítunum á 35. og 45. mínútu með því að setja boltann þéttingsfast niður í vinstra hornið en þriðja vítið sem kom á 77. mínútu setti hann í mitt markið.