Brendan Rodgers hafnaði Liverpool

Brendan Rodgers, stjóri Swansea City, hefur ekki áhuga á því að taka við Liverpool en Guardian segir frá því að Rodgers hafi hafnað viðtali við forráðamenn Liverpool. Rodgers kom til greina sem næsti stjóri Liverpool líkt og þeir Pep Guardiola, Fabio Capello, Roberto Martínez og André Villas-Boas.

Brendan Rodgers skrifaði undir nýjan þriggja og hálfs árs samning við Swansea í febrúar og er að byggja upp nýtt lið. Swansea spilaði frábæran fótbolta á sínu fyrsta ári í ensku úrvalsdeildinni og hélt sér örugglega í deildinni. Liðið vann meðal annars Livepool 1-0 í lokaumferðinni og tryggði sér með því ellefta sætið.

Í stað þess að tala við Liverpool þá ætlar Rodgers að einbeita sér að því að ná samkomulagi við Hoffenheim um Gylfa Þór Sigurðsson. Gylfi sló í gegn hjá Swansea City eftir að hann kom á láni frá þýska liðinu.