Öflugur varnarmaður á leið í KR

Varnarmaðurinn Rhys Weston er á leið í KR samkvæmt heimildum Vísis. Hann er væntanlegur hingað til lands á morgun og liggur tveggja ára samningur á borðinu.

Vefsiðan 433.is greindi frá því í morgun að KR-ingar ættu í viðræðum við Weston og hann sjálfur sagði á Twitter-síðu sinni að hann væri með samningstilboð frá Íslandi.

Weston er á mála hjá Dundee FC sem leikur í skosku B-deildinni. Félagið á í fjárhagskröggum og bauð nokkrum leikmönnum nýja samninga en á lægri kjörum. Weston sagði á Twitter að samningstilboðið frá Íslandi veitti sér meira öryggi.

Samningaviðræður við KR munu vera langt á veg komnar en hann á þó enn eftir að gangast undir læknisskoðun. Weston er uppalinn hjá Arsenal og var í aðalliðinu tímabilið 1999-2000. Hann hefur síðan þá leikið með Cardiff City, Viking í Noregi, Port Vale, Walsall og Dundee þar sem hann var fyrirliði á síðustu leiktíð.

KR-ingar hafa verið að leita að varnarmanni eftir að Skúli Jón Friðgeirsson var seldur til Elfsborg í Svíþjóð.

Kristinn Kjærnested, formaður knattspyrnudeildar KR, vildi ekkert segja um málið þegar Vísir leitaði eftir því.