Grindvíkingar í viðræðum við Nýsjálending

Líklegt er að varnarmaðurinn Steven Old muni ganga í raðir Grindavíkur áður en tímabilið í Pepsi-deild karla hefst um helgina.

Þetta kemur fram á Fótbolti.net en þar staðfestir Guðjón Þórðarson, þjálfari liðsins, að félagið hafi átt í viðræðum við Old sem hefur æft með liðinu síðustu daga.

„Ég hugsa að þetta verði síðasta púslið nema eitthvað óvænt komi upp á," sagði Guðjón.

Old er 26 ára gamall og á sautján leiki að baki með nýsjálenska landsliðinu. Hann lék með Kilmarnock í Skotlandi frá 2009 til 20011 en lék síðast með utandeildarliðinu Basingstoke Town í Englandi.