"Leigusalar verða að vanda valið"

„Þetta mál er svakalegt og eitt það versta sem ég hef séð," segir Sigurður Helgi Guðjónsson, formaður Húseigendafélagsins. Hann var gestur í útvarpsþættinum Reykjavík síðdegis á Bylgjunni í dag og ræddi við þáttastjórnendur um réttindi leigusala og þeirra sem taka húsnæði á leigu.

Mikið hefur verið fjallað um atvik sem upp kom í Keflavík um helgina en þá komu húseigendur að eign sinni í rúst eftir að leiguliðar þeirra höfðu stundað kannabisræktun í bílskúr hússins. Hjónin segja að leigjendurnir hafi beinlínis eyðilegt allt inni í húsinu og sjá þau nú fram á gjaldþrot vegna málsins.

Sigurður segir að lagalegur réttur leigusalanna sé ljós - að sama skapi sé réttarleysi leigjendanna augljóst. Hann vill þó ekki skella skuldinni á húsaleigulögin og bendir á að fólk verði að vanda valið þegar kemur að því að finna leigjendur.

„Það er ótrúlegt hvað leigusalar er oft andvaralausir og sýna í raun barnaskap þegar þeir veita bláókunnugu fólki aðgang að eignum sínum," segir Sigurður. „Það er lítill vandi að komast hjá slíkum vandamálum. Með því að gera rétt í upphafi eru menn yfirleitt á grænni grein. Þá vinna lögin með manni."

Þá Sigurður að leigumarkaðurinn hér á landi sé að mörgu leyti til fyrirmyndar. Því ættu við ekki að láta mál eins og þetta kasta rýrð á leigumarkaðinn sem slíkan. „Þetta er ekki venjan í leigumálum," segir Sigurður. „Venjulega eru þetta ánægjuleg og lukkuleg viðskipti. Leigjendur eru upp til hópa traustir og sómakærir. Það eru hins vegar ljótu málin eins og þetta sem vekja athygli."

Hægt er að hlusta á ítarlegt viðtal við Sigurð hér fyrir ofan.