Sambandið við Svein Andra fullreynt

Fyrirsætan Kristrún Ösp Barkardóttir sem eignaðist frumburðinn Baltasar Börk í byrjun mars vissi ekki hver faðir drengsins var fyrr en í vikunni sem leið. Hún og fallegi drengurinn prýða forsíðu Lífsins í dag þar sem hún ræðir meðgönguna, samband sitt við Svein Andra Sveinsson, föður drengsins, og bjarta framtíðina.

Hvernig brást þú við (í hjartanu) þegar þú fékkst fréttirnar að Sveinn Andri Sveinsson væri faðir Baltasars? Aðallega léttir. Nú er allt komið á hreint eftir allan þennan tíma sem er góð tilfinning. Ég vissi ekki alveg hvorum eða hverjum ég ætti að tilkynna þetta fyrst eða hvernig maður snýr sér í svona máli, enda er ég ekki oft að lenda í þessu en vissulega samgladdist ég honum, hann á fjögur börn úr fyrra sambandi og er ofboðslega góður pabbi. Baltasar á góðan föður og stórkostleg systkini.

Hvernig brást maðurinn sem kom einnig til greina sem faðir Baltasars við fréttunum um að Sveinn Andri væri faðir drengsins? Mér finnst það ekki mitt að segja. Við getum orðað það þannig að við erum mjög góðir vinir.

Varstu viss um að Sveinn Andri væri faðir drengsins? Ég hafði tilfinningu fyrir því. Ég var alltaf að sjá svip hjá honum sem minnti mig á Svein Andra, hins vegar var ég ekki alveg viss en núna þegar það er komið í ljós fer það ekki milli mála.

„Það gleður mig að kynna þennan unga og myndarlega pilt – hann heitir Baltasar Börkur og hann er Sveinsson. Lífið er yndislegt og Guð er góður," skrifaði Sveinn Andri á Facebook-síðuna sína í vikunni. Hvernig brást hann við þegar hann fékk fréttirnar? Vissulega var honum brugðið smávegis fyrst en auðvitað agalega glaður og stoltur enda ekki annað hægt með þennan gullmola.

Hvernig er sambandið milli þín og Sveins Andra í dag og hvernig hefur það verið síðan þú vissir að þú varst barnshafandi? Sambandið var ekki mikið á meðgöngunni enda fannst mér það þeirra val hversu mikið þeir fylgdust með. Við töluðum samt saman af og til, til þess að athuga með hvort annað. Ég var lengur en ég gerði mér grein fyrir að jafna mig á sambandsslitunum. Eftir að ég náði því held ég að samskiptin hafi orðið góð okkar á milli. Ég held við séum fínir vinir og vonandi náum við að rækta vinasambandið enn meira í framtíðinni.

Er Baltasar líkur pabba sínum? Já, það er mikill svipur svo er Baltasar Börkur ofboðslega rólegur og yfirvegaður og mjög spekingslegur.

Heldur þú að þið Sveinn Andri eigið eftir að taka saman aftur í framtíðinni? Nei, það er ekki inni í myndinni hjá okkur. Ég held að við höfum gert okkar tilraun til þess að vera saman og hún gekk ekki upp því miður.