Benni B-Ruff heldur upp á 15 ára starfsafmæli

„Ég held þessu áfram þar til börnin mín fara að heimsækja mig á skemmtistaðina, þá er þetta komið gott," segir Benedikt Freyr Jónsson, eða DJ Benni B-Ruff, sem fagnar 15 ára ferli sínum sem plötusnúður um þessar mundir.

Þegar Benni var 14 ára byrjaði hann með útvarpsþátt ásamt félaga sínum, Didda Fel. Í eitt skiptið fengu þeir í heimsókn til sín Robba Kronik sem bauð þeim í kjölfarið að koma í heimsókn í þáttinn sinn, Kronik. „Ég fékk að taka syrpu í þættinum hjá Robba og þaðan var ekki aftur snúið," segir Benni. Hann segir bransann hafa breyst mikið á þessum 15 árum. „Það er svo hröð þróun í tækninni og það sem byrjaði bara í vynilnum er nú komið í mun fjölbreyttari hluti líka," segir hann.

Benni er nýkominn heim frá New York þar sem hann þeytti skífum á klúbbnum Hotel Chantelle í Lower East side. „Það er samt ekki hótel heldur er víst voða hip og kúl að kalla allt hótel nú til dags," segir Benni og hlær. Tónlistin hans virðist hafa falla vel í kramið úti, því hann hefur þegar fengið boð um að koma aftur út að spila fljótlega.

Í tilefni starfsafmælisins mun Benni slá upp partýi á skemmtistaðnum Faktorý þann 9.júní næstkomandi. Ásamt honum munu margir af helstu plötusnúðum skemmtistaðarins Tetriz spila þar. „Tetriz var aðal staðurinn þegar ég var að byrja í bransanum og margir sem tóku sín fyrstu skref þar," segir Benni að lokum. -trs