Guðmundur samdi við Hauka

Bakvörðurinn Guðmundur Sævarsson skrifaði í gær undir eins árs samning við 1. deildarlið Hauka en hann kemur til liðsins frá erkifjendunum í FH. Það er Morgunblaðið sem greinir frá þessu í dag.

Guðmundur, sem orðinn er 34 ára, tilkynnti á dögunum að hann væri hættur hjá FH og þá fóru strax í gang sögusagnir um að hann væri á leið í Hauka. Það hefur nú gengið eftir.

Þjálfari Hauka er fyrrum þjálfari Guðmundar hjá FH, Ólafur Jóhannesson, en Ólafur hefur styrkt lið Hauka nokkuð síðan hann tók við liðinu.