Fjármálastjóri í Kópavogi á sérkjörum við lóðakaup

Guðrún Pálsdóttir, sem lét af störfum sem bæjarstjóri Kópavogs í febrúar, naut í tíð sinni sem fjármálastjóri bæjarins sérkjara umfram aðra við lóðakaup.

Eftir athugun sem endurskoðunarfyrirtækið Deloitte var í fyrrasumar fengið til að gera á innihaldi peningaskáps sem steyptur er í vegg á bæjarskrifstofunum í Kópavogi komu meðal annars í ljós fjögur skuldabréf vegna kaupa Guðrúnar og eiginmanns hennar á einbýlishúsalóð í Jöklalind 5. Bréfin, sem dagsett eru 27. desember 1996, voru upp á samtals 2.586.400 krónur. Vextir, sem ekki byrjuðu að reiknast fyrr en 18. febrúar 1997, voru 6,0 prósent auk verðtryggingar. Aðrir í sömu stöðu greiddu 6,75 til 6,85 prósent í vexti af sínum skuldabréfum vegna lóðakaupa af bænum.

Síðar kom í ljós við nánari könnun sem Guðríður Arnardóttir, þáverandi formaður bæjarráðs, lét gera að Guðrún borgaði þess utan enga vexti af 1.105.265 króna gatnagerðargjöldum. Engin sambærileg dæmi fundust. Upphæðina greiddi Guðrún á þremur árum – frá því í nóvember 1999 þar til í nóvember 2002.

Mál þetta vó þungt í því að meirihluti Samfylkingar, Vinstri grænna, Næst besta flokksins og Y-lista Kópavogsbúa undirbjó að segja Guðrúnu upp bæjastjórastarfinu fyrr á þessu ári. "Eins og komið hefur fram studdi Samfylkingin ekki bæjarstjóra til áframhaldandi starfa, meðal annars vegna þessa máls," segir Guðríður Arnardóttir um það hvernig brugðist hafi verið við málinu.

Núverandi meirihluti Sjálfstæðisflokks, Framsóknarflokks og Y-lista Kópavogsbúa, sem tók við í febrúar, samdi um starfslok Guðrúnar sem bæjarstjóra en réði hana jafnframt í nýja sviðsstjórastöðu sem hún tekur við í haust. Ármann Kr. Ólafsson bæjarstjóri vill ekki tjá sig um málið að svo stöddu.

Mannleg mistök og tafir á framkvæmdumGuðrún Pálsdóttir segist enga skýringu sjá á lægri vöxtum á skuldabréfunum aðra en að um mannleg mistök hafi verið að ræða. „Því miður veitti ég þessu ekki athygli þegar við skrifuðum undir bréfin. Enda kom þetta mér í opna skjöldu nú 15 árum síðar."

Spurð hver hafi tekið ákvörðun um að innheimta ekki vexti af gatnagerðargjöldum, segir hún að vegna deiliskipulagsbreytinga hafi framkvæmdir við hús hennar tafist úr hófi og „því var gert samkomulag við yfirboðara mína um greiðslufyrirkomulag á viðbótargjöldunum."

Aðspurð hvort þetta hafi verið venjulegt vinnulag segir Guðrún: „Breytingar af hálfu bæjarins sem skapa tafir hjá lóðarhöfum um lengri tíma hafa ætíð leitt til niðurfellingar vaxta. Og oft skaðabótakrafna af hálfu lóðarhafa."

Guðrún segist ekki telja að hún hafi notið kjara, sem öðrum stóðu ekki til boða. Aðspurð hvort hún hafi gefið bæjarfulltrúum skýringar á málinu segir hún: „Fyrrverandi meirihluti skoðaði málið með mér og öðrum embættismönnum."