Leik ÍBV og Selfoss frestað til morguns

Viðureign ÍBV og Selfoss í 12. umferð Pepsi-deildar karla sem fara átti fram á Hásteinsvelli í Eyjum klukkan 16 í dag hefur verið frestað til morguns vegna veðurs. Þetta kemur fram í fréttatilkynningu frá Knattspyrnusambandi Íslands.

Selfoss átti að ferðast til Eyja með Herjólfi klukkan 13 í dag en ferðina þurfti að fella niður vegna mikillar ölduhæðar. Þetta kemur fram á heimasíðu Herjólfs.

Leikur liðanna fer fram á Hásteinsvelli á morgun klukkan 18.

Einn leikur fer fram í Pepsi-deild karla í dag. FH sækir Grindavík heim klukkan 19.15. Leikurinn verður í beinni textalýsingu hér á Vísi.