Aron Pálmarsson farinn til Þýskalands í læknisskoðun

Landsliðsmaðurinn Aron Pálmarsson hélt í morgun til Þýskalands í læknisskoðun. Þetta kom fram í hádegisfréttum á Bylgjunni í dag.

Aron hefur glímt við meiðsli á hné og ekkert æft með íslenska liðinu síðan á Frakklandsmótinu um síðustu helgi.

Á blaðamannafundi á fimmtudag sagði Guðmundur Guðmundsson, landsliðsþjálfari Íslands, að læknar landsliðsins hefðu tjáð sér að Aron yrði klár fyrir Ólympíuleikana.

Forráðamenn Kiel vilja hins vegar að Aron fari í skoðun hjá læknum félagsins. Af þeim sökum er vinstri skyttan flogin til Þýskalands.

Ljóst er að óvissa um þátttöku Arons á Ólympíuleikunum sem settir verða á föstudag er mikil.