Harpa Ólafsdóttir: Þurfum að gæta hagsmuna okkar sjóðsfélaga

Harpa Ólafsdóttir, formaður stjórnar Gildis, segir sjóðinn ítrekað hafa óskað eftir því að fá betri sundurliðun á kostnaði hjá slitastjórn Glitnis, en ekki fengið. Það sé óásættanlegt þar sem sjóðsfélagar eigi heimtingu á því að fá þessar upplýsingar nákvæmlega niðurgreindar.

Lífeyrissjóðirnir Gildi og lífeyrissjóður Verzlunarmanna hafa ákveðið að leita réttar síns fyrir dómi, og óska eftir sundurliðun á kostnaði við slit Glitnis, og þá einkum þegar kemur að launagreiðslum til þeirra Steinunnar Guðbjartsdóttur og Páls Eiríkssonar, sem sitja í slitastjórn bankans. Frá þessu var greint í Viðskiptablaðinu í gær.

Harpa Ólafsdóttir, stjórnarformaður Gildis og framkvæmdastjóri kjarmálasviðs stéttarfélagsins Eflingar, segir að sjóðurinn hafi margítrekað reynt að fá betri upplýsingar, en ekki fengið.

„Kveikjan að þessu er óánægja með hvað kostnaðurinn er hár, og einnig að fá ekki þær upplýsingar upp gefnar sem beðið er um. Það liggur í hlutarins eðli að við þurfum að fá upplýsingar um þennan kostnað þar sem við höfum hagsmuna að gæta fyrir okkar sjóðsfélaga sem eiga rétt á því að fá að vita hvernig þessum málum er háttað," segir Harpa.

Hún segir stjórn Gildis hafa verið einhuga um að reyna með öllum ráðum að fá ítarlegustu upplýsingar fram, um launakostnaðinn hjá þrotabúi Glitnis, fyrst ekki var hægt að fá hann frá slitastjórninni.

Stefnt er að því að ljúka nauðasamningsferli Glitnis, fyrir lok þessa árs, en Steinunn Guðbjartsdóttir, formaður slitastjórnarinnar, hefur sagt að kröfuhafar stýri ferðinni í þeim efnum, og hvers hratt málin vinnist.