Gervitennur í fermingargjöf

Rannsóknir sýna að tennur Íslendinga skemmast nú hraðar en hjá flestum öðrum þjóðum, t.d. skemmast tvisvar sinnum fleiri tennur í 12 ára börnum okkar en hjá hinum Norðurlandaþjóðunum.

Flestir vita að aðalorsök tannskemmda er mikil neysla á sykri, einkum í gosdrykkjum og sælgæti, sem okkur hefur gengið erfiðlega að neyta í hófi. Hver Íslendingur borðar nú á ári hverju 70 kg af sykri, 19 kg af sælgæti og drekkur um ½ lítra af gosdrykkjum dag hvern.

Áhrifaríkasta og ódýrasta aðgerðin til að minnka tannskemmdir er án efa að breyta matarvenjum okkar og minnka neyslu sætinda. En auk þess er nauðsynlegt að hafa reglubundið eftirlit með tönnum barna og unglinga á hálfs árs eða eins árs fresti eftir þörfum. Sé það gert er síður hætta á að skemmdir myndist og verði stórar.

Vonandi fá starfsbræður mínir og -systur ekki sams konar bón og ég í upphafi starfsferils míns um 1960. Þá kom til mín móðir sem bað mig um að smíða gervitennur í dóttur sína því að erfitt væri að láta hana fermast með sínar áberandi skemmdu tennur. Eftir að hafa skoðað ástand tanna stúlkunnar skildi ég mætavel áhyggjur móðurinnar. Við erum auðug þjóð og höfum nægjanlega margt sérþjálfað starfsfólk til að veita vandaða tannlækningaþjónustu.

Nauðsynlegt er að börn og unglingar fái fría tannlækningaþjónustu til 18 ára aldurs eins og hjá hinum norrænu ríkjunum. Venjist þau á reglubundið eftirlit verður það þeim eðlilegt og sjálfsagt.