Til hamingju með daginn

Miðvikudaginn 7. nóvember er Félagsmiðstöðvadagurinn haldinn hátíðlegur um allt land. Þá opna félagsmiðstöðvarnar í landinu dyr sínar fyrir fyrir gestum og gangandi, foreldrum og gömlum heimalingum félagsmiðstöðvanna.

Félagsmiðstöðvar hafa ekki verið starfandi lengi en fyrsta „tómstundarheimilið" opnaði á Lindargötunni 1. október 1957. Það hefur mikið vatn runnið til sjávar á þessum 55 árum og eru nú starfræktar félagsmiðstöðvar í flest öllum hverfum og bæjum landsins. Nú er einnig hægt að læra tómstunda- og félagsmálafræði við Háskóla Íslands og hefur fagþekking aukist til muna innan veggja félagsmiðstöðva.

Félagsmiðstöðvar í dag eru eins konar brú milli grunnskólans og skóla lífsins. Í félagsmiðstöðvunum starfar fagfólk í uppeldisfræðum sem beitir hinum ýmsu verkfærum til að hjálpa unglingunum í sjálfsmyndarleit sinni og má þar nefna leiklist, kvikmyndagerð, íþróttir, ræðumennsku, tónlist, myndlist og þannig mætti lengi telja. Í félagsmiðstöð er enginn námskrá og engin mætingarskylda svo starfið er sveigjanlegt og síbreytilegt eftir þörfum unglinganna. Starfið í félagsmiðstöðvunum byggir á þátttöku ungs fólks og lýðræði. Það eru allir jafnir innan veggja félagsmiðstöðvarinnar og nefndir og ráð á vegum unglinganna sjá um skipulagningu og framkvæmd á starfinu.

Þrátt fyrir að vera án námskrár þá eru viss grunn markmið sem allt starfið byggir á. Yfirmarkmið félagsmiðstöðvarinnar er að styrkja sjálfsmynd unglinganna og er það gert með því að vinna með hópa á jákvæðum forsendum til að auka samskiptaþroska og sjálftraust unglinganna.

Það er gaman að segja frá því að samkvæmt nýjustu skýrslu Rannsóknar og greiningar mæta 44% af unglingum í 9. og 10. bekk á opin hús á vegum félagsmiðstöðvanna og 74,2% mæta á viðburði á vegum félagsmiðstöðvanna. Þetta háa hlutfall ungs fólks sem mætir af fúsum og frjálsum vilja í þetta opna lýðræðislega uppeldisstarf hljóta að teljast góð tíðindi fyrir íslenskt samfélag.

Nú hvet ég þig til að kynna þér hvað félagsmiðstöðin í hverfinu þínu býður upp á í tilefni dagsins, ég hvet þig til að kynna þér það starf sem fram fer í hverfinu þínu og einnig að kynnast starfsfólkinu sem heldur utan um starfið.