Frakkar og Svíar spila um gullið á ÓL í London

Frakkar eru komnir í úrslitaleikinn í handboltakeppni karla á Ólympíuleikunum í London eftir þriggja marka sigur á Króatíu, 25-22, í undanúrslitunum í kvöld. Frakkar mæta Svíum í úrslitaleiknum á sunnudaginn en Ungverjar og Króatar spila um bronsið.

Frakkar geta því varið Ólympíugullið sitt sem þeir unnu í Peking fyrir fjórum árum eftir sigur á íslenska landsliðinu í úrslitaleiknum. Þeir geta ennfremur unnið sitt sjötta stórmót frá og með árinu 2006.

Markaskorið dreifðist mikið hjá franska liðinu í kvöld. Luc Abalo, Samuel Honrubia og Daniel Narcisse voru markahæstir með fjögur mörk en Nikola Karabatic og William Accambray skoruðu allir þrjú mörk. Thierry Omeyer varði 19 skot í markinu. Zlatko Horvat skoraði mest fyrir Króata eða sex mörk.

Frakkar byrjuðu leikinn gríðarlega vel, skoruðu þrjú fyrstu mörkin og þvinguðu Slavko Goluza, þjálfara Króata til að taka leikhlé eftir aðeins 4 mínútur.

Frakkar komust í 5-1 og voru með ágætt forskot þar til að Króatar minnkuðu muninn í eitt mark, 9-8, þegar sjö mínútur voru til hálfleiks.

Frakkar komust aftur þremur mörkum yfir, 12-9, en Króatar áttu lokaorðið fyrir hálfleik og minnkuðu muninn í 12-10.

Thierry Omeyer hélt Frökkum á floti í fyrri hálfleiknum þegar hann varði 13 af 23 skotum sem á hann komu eða 57 prósent skotanna.

Frakkar voru sterkari í seinni hálfleiknum og náðu mest fim marka forskoti, 18-13 þegar hálfleikurinn var um það bil hálfnaður. Króötum tókst að minnka muninn niður í tvö mörk en nær komust þeir ekki.

Úrslitin í undanúrslitunum í dag þýða að tvær þjóðir sem íslenska landsliðið vann í riðlakeppninni, Frakkland og Svíþjóð, mætast í úrslitaleiknum sem sýnir enn frekar hversu nálægt íslenska liðið var því að vinna verðlaun á leikunum. Frakkar unnu alla leiki sína eftir tapið á móti Íslandi.