Mest lesnu innlendu fréttir ársins 2012

Þegar horft er um öxl, yfir árið sem er að líða, er ljóst að lesendur Vísis hafa haft mikinn áhuga á tveimur atburðum umfram aðra. Annars vegar er um að ræða óveður sem varð á höfuðborgarsvæðinu í byrjun nóvember. Hins vegar er það Egill Einarsson, Gillzenegger, rannsókn á máli hans og þær afleiðingar sem það hefur haft. Hér að neðan má sjá tíu mest lesnu fréttir ársins.



1. Ótrúlegt myndband af óveðrinu í Reykjavík

Mest skoðaða fréttin er af óveðri sem gerði á höfuðborgarsvæðinu og víðar, í byrjun nóvember. Kristinn Jón Eysteinsson tók upp ótrúlegt myndband við Sæbrautina í Reykjavík. Myndskeiðið sýnir hvernig öldurnar ná fleiri metra upp á land. Umtalsverðar skemmdir urðu í óveðrinu og námu tryggingabætur á annað hundrað milljón krónur.

2. Egill fluttur í lífshættu á gjörgæslu

Önnur mest lesna fréttin var frétt af því að Egill Einarsson hefði verið fluttur í lífshættu á gjörgæsludeild. Þetta var í maí, en eftir því sem Vísir kemst næst hefur Egill náð sér að fullu.

3. Helvítis lygamörður! Komdu þér út

Þriðja mest lesna fréttin var af leiðindaatviki sem gerðist á Hlemmi í sumar. Þá lenti starfsmaður á Hlemmi í ryskingum við mann sem var þar inni. Blaðamaður á Grapevine tók myndskeið og birti myndirnar á vef blaðsins. Í ljós kom að deilur varðarins og gestsins höfðu átt sér nokkurn aðdraganda.

4. Þriggja pilta leitað eftir hrottalega árás á barn

Fjórða mest lesna fréttin var svo frásögn Þórarins Engilbertssonar knattspyrnuþjálfara, sem kvaðst hafa orðið vitni að því að fjórir 12-13 ára drengir hefðu ráðist á yngra barn í Breiðholtinu. Lögreglan hóf rannsókn á málinu en hvorki barnið sem varð fyrir árásinni né drengirnir hafa fundist. Þórarinn hefur þó ekki viðurkennt að hafa sagt ósatt.

5. Egill aftur kærður fyrir nauðgun

Fimmta mest lesna fréttin var svo frétt af því að Egill Einarsson hafi verið kærður fyrir nauðgun í annað sinn. Það var í janúar á þessu ári. Rétt er að taka fram að rannsókn á málum Gillzeneggers voru látnar niðurfalla en eftir stendur rannsókn lögreglu á röngum sakargiftum á hendur honum.

6. Grænlenskt ofsaveður gæti náð til Íslands

Sjötta mest lesna fréttin var síðan af því að grænlenskt ofsaveður, eða svonefnt Piterak veðri í Ammasalik í Grænlandi og þar í grennd, gæti komið til Íslands. Ekkert varð þó úr því.

7. "Augljóslega ekki allt í lagi hjá þessum dreng"

Sjöunda mest lesna fréttin var síðan ummæli Egils Einarssonar um Inga Kristján Sigurmarsson, sem birti umdeilda mynd af Agli Einarssyni á Instagram. "Myndin segir meira um þann sem gerði hana en mig," sagði Egill um myndina.

8. Magnaðar myndir: Fólk í stórhættu í ofsaveðri

Áttunda mest lesna fréttin er líka um óveðrið í byrjun nóvember. Maður fauk um koll, skammt frá Sæbrautinni, enda var vindstyrkurinn langmestur þar. Svo grafalvarlegar voru aðstæður á þessum slóðum að starfsmenn hússins þar sem Hamborgarafabrikkan er til húsa stilltu sér upp fyrir utan húsið til að grípa fólk sem fauk um koll. Anton Brink ljósmyndari var staddur þarna, kom manninum til aðstoðar og tók myndir af öllu saman.

9. Bresk barnaverndayfirvöld vilja svipta móður Ellu Dísar forræði

Níunda mest lesna fréttin var svo um það að bresk barnaverndayfirvöld vilja svipta móður Ellu Dísar forræði. Vísir hefur ítarlega sagt frá málum Rögnu Erlendsdóttur, móður Ellu Dísar sem er langveik ung stelpa. En í viðtali við DV, sem Vísir vitnaði til, greindi hún frá því að barnaverndayfirvöld í Bretlandi væru í samstarfi við íslensk barnaverndayfirvöld um að reyna að ná barninu.

10. Guðni hlaut áverka þegar hann reyndi að bjarga manni frá hnífaárás

Tíunda mest lesna fréttin var svo af því að Guðni Bergsson hefði hlotið áverka þegar hann reyndi að bjarga Skúla Sigurz þegar Guðgeir Guðmundsson réðst á hann. Árásin var grafalvarleg, enda var Guðgeir dæmdur fyrir tilraun til manndráps.