Skattgreiðendur fá 19 milljarða reikning í hausinn

„Yfirtaka ríkisins á SpKef er orðið eitt mesta klúður sem sést hefur í tíð ríkisstjórnarinnar," segir Bjarni Benediktsson, formaður Sjálfstæðisflokksins, en í ljós hefur komið að það kostar ríkið 19 milljarða að tryggja innistæður í sparisjóðnum. Bjarni bendir á að Gylfi Magnússon, þáverandi ráðherra bankamála, hafi fyrst sagt að yfirtaka ríkisins myndi einungis kosta 800 milljónir sem myndu endurheimtast. Árni Páll Árnason, eftirmaður hans, hafi sagt að leggja þyrfti 11,2 milljarða vegna ofmats á eignum.

„Nú er komið í ljós að það sem í upphafi átti ekki að kosta neitt kostar 19 milljarða," segir Bjarni. Einhver hljóti að bera ábyrgð á því að fara yfir svona mál, leggja mat á upplýsingar til þess að taka ákvarðanir. Ákveðnar stofnanir eigi að hafa eftirlit með þessu ferli og ráðuneyti eigi að vinna ákveðna vinnu til að leggja grunn að ákvörðun. „Og það er alveg augljóst að menn hafa gert slík mistök að á endanum eru það skattgreiðendur sem fá 19 milljarða reikning í hausinn. Það er gríðarlega alvarlegt mál," segir Bjarni.

Bjarni spyr sig líka hvort það geti verið að virði eignanna hafi rýrnað svo mikið frá því að SpKef komst í eigu ríkisins. „Það er bara tvennt sem getur komið til annað hvort var lagt svona kolrangt mat á eignirnar eða að virði þeirra rýrnaði svona eftir að þær komust í hendur rikisins," segir Bjarni.