Arnór: Er mjög sorgmæddur

Arnór Atlason þarf nú að finna sér nýtt félag eftir að AG Kaupmannahöfn lýsti sig gjaldþrota á dögunum. Snorri Steinn Guðjónsson er í sömu sporum.

Fréttirnar af gjaldþroti AG bárust þegar að Ísland var að spila við Túnis fyrr í þessari viku og komu fréttirnar leikmönnunum í opna skjöldu.

„Það er alltaf hræðileg stund þegar fólk missir vinnuna sína. Ég hef nú ekker lið til að spila með og hef í raun ekkert meira um málið að segja. Hvað get ég sagt?" sagði Arnór við Vísi. „Ég er að sjálfsögðu mjög sorgmæddur út af þessu."

Hann segist ekki láta þetta trufla þó einbeitingu sína fyrir leiki Íslands á Ólympíuleikunum í London sem nú standa yfir en Ísland mætir einmitt Frakklandi í kvöld.

„Ég geri mitt besta fyrir íslenska landsliðið hvort sem ég er með klúbb eða ekki. Ég legg mig alltaf fram fyrir landsliðið og ég ætla líka að njóta þeirra daga sem við eigum fram undan hér úti. Framtíðin kemur svo bara í ljós síðar."