Ekki of margir ferðamenn - þeir koma bara allir á sama tíma

„Það er rétt að ferðaþjónusta hér á landi hefur vaxið mjög hratt, en ég hef ekki heyrt þetta sjónarmið áður frá stjórnmálamanni," segir Erna Hauksdóttir, framkvæmdastjóri Samtaka ferðaþjónustunnar (SAF), um ummæli þingmanns Hreyfingarinnar, Þórs Saari, þar sem hann viðraði þá hugmyndi í Reykjavík síðdegis á Bylgjunni í gær að það væri „einsýnt að það verði að bregðast við með fjöldatakmörkunum [ferðamanna] með einhverjum hætti".

Erna segir að samtökin hafi síðustu misseri unnið í góðri samvinnu við stjórnvöld að auka fjölda ferðamanna yfir vetratímann. „Í raun fer meira eða minna allt markaðsfé í vetrarþjónustuna," bætir Erna við.

Hún segir þó alveg rétt að það komi ákveðnir toppar yfir sumarið þar sem fjöldi ferðamanna verður gríðarlegur. Það megi meðal annars útskýra mikinn ferðamannastraum yfir hásumarið, sem vinsælasti ferðamannatíminn, og svo bætist gríðarlegur fjöldi ferðamanna við sem koma til landsins með skemmtiferðaskipum.

„Og þannig verða ákveðnir staðir nokkuð ásetnir," segir hún og nefnir í því samhengi hinn fræga gullna hring, sem er Gullfoss, Geysir og Bláa lónið. Erna áréttar þó að það séu margir dagar yfir sumarið þar sem gestir eru næstum einir að skoða þessar náttúruperlur.

„Það sem skiptir mestu máli er að dreifa ferðamönnum yfir árið og hlúa að þessum ásetnu stöðum," segir Erna sem telur mikilvægt að almennileg uppbygging verði í kringum náttúruperlur Íslands, sem ferðamenn sæki helst í.

Þannig hafnar hún þeirri hugmynd að takmarka verði fjölda ferðamanna, enda ekki nægilega margir sem sækja landið heim yfir vetrartímann að hennar mati.

Í viðtalinu í Reykjavík síðdegis sagði Þór einnig að mikil ferðamennska skemmi samfélagið sem fyrir er í landinu. „Íslendingar sem fara niðrí miðbæ á sitt kaffihús sem þeir hafa kannski gert árum saman komast ekki að vegna þess að það er allt fullt af einhverjum ferðamönnum," sagði hann.

Erna blæs á þetta. Hún spyr á móti hvaða miðborg heimsins sé ekki full af ferðamönnum yfir hásumar. „Ég held að fólk gleðjist frekar yfir því að hafa ferðamenn í borginni," segir hún og bendir á hið fjölskrúðuga líf sem fylgir ferðamannastraumnum í miðbæ Reykjavíkur.

„Annars koma 200 milljarðar af erlendum gjaldmiðli með ferðamönnum til landsins, og hvaðan ætlar Þór að fá þennan pening ef ekki frá ferðamönnunum? Hann þyrfti að svara því," segir Erna að lokum.