Raunhæft að fullvinna stjórnarskrárfrumvarp í vetur

Formaður Stjórnskipurnar- og eftirlitsnefndar Alþingis telur að hægt verði að klára fyrstu umræðu um frumvarp að nýrri stjórnarskrá fyrir jól. Formaðurinn er bjartsýn á að hægt verði að ljúka málinu fyrir Alþingiskosningarnar í vor.

Formaðurinn, Valgerður Bjarnadóttir þingkona Samfylkingarinnar er ánægð með niðurstöður kosninganna sem hún segir gott veganesti fyrir áframhaldandi vinnu.

„Þetta er mjög ánægjuleg úrslit og afgerandi. Góð þáttaka í koningu af þessu tagi og síðan er svarið við fyrstu spurningunni, sem ég vil kalla stóru spurninguna, mjög afgerandi, þ.e. við eigum að leggja tillögur stjórnlagaráðs til grundvallar stjórnarskránni," segir hún.

Aðspurð um næstu skref í málinu segir Valgerður:

„Það er semsagt sérfræðingahópur búinn að vinna síðan í júní að því að fara gaumgæfilega niður í þessar tillögur. Plagg af þessu tagi verður auðvitað að vera lagalega pottþétt. Ég á von á því á að þau geti skilað eftir tvær vikur, ekki síðar og þá kemur að þinginu að taka þetta til umræðu og ég á von á því að við getum lokið fyrstu umræðu fyrir jól alla vega,"

Málið hefur verið umdeilt á meðal þingmanna en Valgerður vonast eftir því að hægt verði að vinna málið á þinginu í góðri samvinnu allra.

„Ég mun leggja mig alla fram um að það verði hægt. Vegna þess að nú verðum við að fara að huga að því hvernig við vinnum í þinginu og afla þinginu traust," segir hún.

Þannig að þú ert bjartsýn á að það sé hægt að klára þetta mál fyrir alþingiskosningarnar í vor?

„Já, það á alveg að vera hægt. Ég er bjartsýn á það já," sagði Valgerður Bjarnadóttir.