Jóhanna er stolt af þjóðinni

Jóhanna Sigurðardóttir, forsætisráðherra, telur að þingmenn verði mjög bundnir af niðurstöðu þjóðaratkvæðagreiðslunnar um tillögur stjórnlagaráðs sökum þess hve afgerandi niðurstaðan var.

„Ég er stolt af þjóðinni fyrir að skila Alþingi þessari niðurstöðu," sagði Jóhanna í viðtalsþættinum Silfri Egils í morgun, en þar komu saman fulltrúar allra stjórnmálaflokka á þingi til að ræða niðurstöðu kosninganna.

Jóhanna er ánægðust með niðurstöðu þjóðarinnar um það álitaefni hvort náttúruauðlindir sem ekki eru í einkaeigu eigi að vera lýstar þjóðareign í nýrri stjórnarskrá.

Hún telur að Alþingi geti í vetur komið sér saman um viðunandi breytingar á stjórnarskránni sem byggðar verði á tillögum stjórnlagaráðs. „Ef viljinn er fyrir hendi ættum við að geta náð viðunandi niðurstöðu fyrir vorið," segir hún.

Bjarni Benediktsson, formaður Sjálfstæðisflokksins, var ekki jafnjákvæður. „Það er ekki hægt að gera lítið úr því þegar helmingur kosningabærra manna situr heima," sagði hann en kjörsókn í gær var rétt um 50%. Þá lýsti hann ítrekað þeirri skoðun að málið hefði átt að fara beint í efnislega umræðu á þingi.

Sigmundur Davíð Gunnlaugsson, formaður Framsóknarflokksins, taldi niðurstöðu kosninganna gott innlegg. Nú þyrfti hins vegar að fara yfir hvað í tillögum stjórnlagaráðs standist lagalega séð og hverju þurfi að breyta. „Ég held að flestir geri sér grein fyrir því að það þurfi að fara betur yfir margt og skýra ýmislegt," sagði hann.

Þór Saari, þingmaður Hreyfingarinnar, benti á að það væri afgerandi stuðningur við tillögur stjórnlagaráðs allar nema hugsanlega hugmyndir ráðsins um þjóðkirkjuna, en meirihluti virðist fyrir því að ákvæði um þjóðkirkju séu í stjórnarskrá. „Það þarf alls ekki að taka langan tíma að fullvinna frumvarpið. Það er alveg á hreinu," sagði Þór og benti á að tillögur stjórnlagaráðs grundvölluðust á ævintýralegri vinnu hinna ýmsu nefnda og ráða. „Mér heyrist á Bjarna og Sigmundi að þeir ætli að tefja vinnuna í þinginu," sagði Þór og þótti það miður. Þessi fullyrðing kom hins vegar flatt upp á þá fyrrnefndu.