Magnús Páll samdi við Víking

Pepsi-deildarlið Víkings fékk fínan liðsstyrk í gær þegar framherjinn Magnús Páll Gunnarsson skrifaði undir tveggja ára samning við félagið.

Magnús getur þó ekki byrjað að spila með félaginu fyrr en 15. júlí þegar félagaskiptaglugginn opnast á nýjan leik.

"Ég er mjög ánægður að fá Magnús í okkar raðir. Okkur vantar styrkingu í framlínuna," sagði Andri Marteinsson, þjálfari Víkings, við Vísi í dag.

Magnús Páll hefur síðustu ár leikið í Þýskalandi en lék þar áður með Breiðablik. Hann fékk bronsskóinn árið 2007.