Guðjón Baldvinsson ætlar að komast í sögubækur KR

„Mér leið mjög vel fyrir leikinn. Hafði verið að skora og að komast í gang. Ég ætlaði mér að fara að skora í deildinni líka og svo fengum við draumabyrjun þegar ég skoraði eftir nokkrar mínútur. Þetta gekk allt upp. Við spiluðum vel og gekk vel hjá mér,“ sagði Guðjón.

„Ég hefði auðveldlega getað sett fimm mörk. Maður getur samt ekki verið ósáttur við þrennuna. Það hefur verið markmið lengi að skora þrennu fyrir KR. Ég skoraði nokkrar þrennur með Stjörnunni en mér hafði ekki einu sinni tekist að skora þrennu í æfingaleik fyrir KR. Alltaf skorað tvö en það þriðja kom aldrei. Þetta var eitt af mínum stærstu markmiðum fyrir sumarið að ná fyrstu þrennunni því það opnar ákveðnar flóðgáttir. Þá kemur sjálfstraust og það var frábært að ná því.“

Guðjón segist halda utan um markafjölda sinn hjá KR enda stefni hann á ákveðinn fjölda.

„Ég skoraði níu 2008, tíu í fyrra enda mikið meiddur. Ég stefni á að skora enn fleiri í ár. En heildarmarkmið mitt hjá KR er að verða einn af markahæstu mönnum sem hafa spilað fyrir félagið og komast í einhverjar sögubækur,“ segir Guðjón.

Guðjón segir að kona hans og vinir sjái mikinn mun á geðheilsu hans þegar hann er að skora.

„Þótt maður segi í viðtölum þegar maður er ekki að skora að það skipti ekki máli, þá skiptir það máli. Sem framherji er þetta það skemmtilegasta sem maður gerir. Maður reynir að láta það ekki hafa áhrif á sig utan fótboltans en það gerir það ósjálfrátt. Þannig að ég er mjög skemmtilegur þessa dagana,“ segir Guðjón og hlær.

Guðjón er annálaður fyrir mikla fullkomnunaráráttu. Hann segist alltaf hafa verið þannig. Hann vilji hafa allt í röð og reglu í kringum fótboltann.

„Foreldrar mínir gagnrýndu mig í byrjun móts fyrir að ég tæki þetta allt of alvarlega. Ég yrði að vera afslappaðri og fá mér eitthvað að borða og einhvern tímann að sofa. En ég get ekki verið sá karakter. Ég vil hafa allt á hreinu. Fara að sofa á réttum tíma fyrir leik og borða réttan mat. Hafa allt þannig að ég fari með góða samvisku inn í leikinn og léttur á mér,“ segir Guðjón.

Guðjón er annálaður hrekkjalómur. Félagar hans í yngri landsliðum urðu reglulega fyrir barðinu á honum en hann hefur hegðað sér vel síðan hann kom til KR.

„Ég hef kannski ekki fengið tækifæri til þess að hrekkja einhvern í KR. Ég mæti bara á æfingar og fer svo heim. Í landsliðsferðalögunum var mikið verið að gista og hanga á hótelherbergjunum. En það er aldrei að vita nema það detti inn hrekkur í Evrópukeppninni. Menn ættu að vera á tánum,“ segir Guðjón.

KR-ingar mæta MSK Zilina frá Slóvakíu í Evrópudeildinni á fimmtudag. Félagið komst í riðlakeppni Meistaradeildar Evrópu á síðustu leiktíð.

„Það eru miklir peningar í húfi fyrir félagið. Við vitum allir hvað þetta skiptir miklu máli og við munum leggja okkur alla fram. Það sem við búum að er að þeir eru á undirbúningstímabilinu en við á miðju tímabili. Við ættum kannski að vera lið sem er vanmetið,“ segir Guðjón.

Spurður hvort leikmannanna bíði væn bónusgreiðsla standi þeir sig vel gegn Zilina segir Guðjón:

„Nei, ég held að bónusinn fyrir okkur sé sá að lið eins og Atletico Madrid, Stoke og Fulham bíða í næstu umferð. Það væri draumur að mæta svoleiðis liði.“

Lið 10. umferðar:

Markvörður: Haraldur Björnsson, Valur

Varnarmenn:

Guðjón Árni Antoníusson, Keflavík

Kelvin Mellor, ÍBV

Grétar Sigfinnur Sigurðsson, KR

Guðmundur Reynir Gunnarsson, KR

Miðjumenn:

Finnur Ólafsson, ÍBV

Halldór Orri Björnsson, Stjarnan

Jóhann Birnir Guðmundsson, Keflavík

Sóknarmenn:

Tryggvi Guðmundsson, ÍBV

Kristinn Steindórsson, Breiðablik

Guðjón Baldvinsson, KR