Framsóknarflokkurinn fordæmir skrif Eiríks Bergmanns

Þingflokkur Framsóknarflokksins fordæmir umfjöllun Eiríks Bergmanns Einarssonar, dósents við Bifröst og fyrrverandi varaþingmanns Samfylkingarinnar, um Framsóknarflokkinn sem birt var í Fréttatímanum um síðustu helgi. Í yfirlýsingu sem Framsóknarflokkurinn hefur sent frá sér segir að umfjöllunin sé villandi og meiðandi. Eiríkur fjalli þar um ýmsar þjóðernisöfgahreyfingar og blandi Framsóknaflokknum í þá umræðu með afar undarlegum hætti.

Þingmenn Framsóknarflokksins segjast ekki geta setið undir ósönnum aðdróttunum um þjóðernisöfgar og útlendingahatur, aðdróttunum sem settar séu fram í pólitískum tilgangi og á fráleitum forsendum. Ekkert í stefnu flokksins réttlæti slíka umfjöllun, enda víki Eiríkur ekki einu orði að stefnu flokksins í skrifum sínum.