Halldór: Viljinn og getan okkar megin

Halldór Kristinn Halldórsson átti góðan leik fyrir Val í hjarta Valsvarnarinnar. Hann segir að viljinn hafi verið meiri Valsmegin en liðið lagði Þór 3-0 í kvöld.

"Þetta var mjög erfiður leikur. Þórsarar hlaupa endalaust og ef menn eru ekki klárir gegn þeim þá tapa þeir bara. Við vorum lengi í gang en við vorum bara að reyna að keyra upp baráttuna."

"Um leið og það tókst vorum við betri. Við sköpuðum okkur fleiri færi og mér fannst viljinn einfaldlega vera meiri hjá okkur, sem og fótboltagetan," sagði hinn uppaldi Leiknismaður en Valur er þar með komið á topp deildarinnar.

"Það gefur okkur að sjálfsögðu byr undir báða vængi en það er bara gott að fá stigin. Það er yndislegt að halda hreinu og ná í þrjú stig, annars hefði ferðin heim verið hundleiðinleg," sagði Halldór brosmildur.