Óli Þórðar: Vorum teknir í kennslustund

„Frá fyrstu mínútu til síðustu var þetta kennslustund í fótbolta. Við komumst yfir þvert gegn gangi leiksins og það var engan vegin sanngjarnt en svona er þetta. Fótbolti getur farið á alla vegu en Stjörnumenn héldu áfram og stútuðu okkur,“ sagði þungur á brún Ólafur Þórðarson þjálfari Fylkis eftir ósigurinn gegn Stjörnunni í kvöld.

„Þeir uppskáru þá vinnu sem þeir lögðu í leikinn. Við lentum undir á allan hátt í dag. Það vantaði meiri vilja í liðið. Það vantaði meiri vilja og metnað til að gera betur. Aðalmálið er að ef menn vilja vera í toppbaráttunni þá þurfa menn að berjast fyrir því. Það kemur ekki að sjálfu sér.

Við komumst ekki þangað úti í einhverjum hornum úti í bæ, við komumst þangað bara á því að spila leikina. Töpuð stig á velli sem þessum skilur á milli þess að vera í toppbaráttunni eða ekki,“ sagði Ólafur að lokum.